Buddusò, domos de gianas de Ludurru

Prenuràgicu

Su Prenuràgicu in Sardigna s'aunit cun sa preistòria, est a nàrrere cun cudda fase de s'istòria umana in ue non fiat istada imbentada s'iscritura. Sos datos archeològicos sunt s'ùnica fonte de informatziones chi nos cunsentit de fàghere lughe subra sas costumàntzias de bida de s'òmine in custu tempus.

Su Prenuràgicu incluit un'arcu cronològicu ampru meda e, comente su nùmene faghet a cumprèndere a manera crara, lompet fintzas a sos liminàrgios de sa fase rapresentada in Sardigna dae sa tzivilidade nuràgica.

Custa època istentosa de s'istòria sarda sos istudiosos l'ant partzida in fases cronològicas, onniuna de custas dividida in sutafases e articulada in àteras fases culturales.

Su tèrmine "cultura" s'impreat in campu de sos istùdios de preistòria pro denumenare s'unione de totu sos manufatos (ogetos e edifìtzios) chi presentent piessinnos a manera de pòdere èssere interpretados comente espressada de sa cultura materiale de una populatzione dada o de unu grupu ètnicu dadu.

Su Prenuràgicu inserrat sas fases cronològicas chi sighint de s'istòria de sa Sardigna: su Paleolìticu, su Mesolìticu, su Neolìticu, s'Eneolìticu (o Calcolìticu).